By: Frans Sinengela
Epangelo lopokafimbo la Sudan ola shiivifa ekufemo lovakwaita moshilandopangelo Khartum, nokutya ombili ya alukila moshilongo konima yomalipumomumwe pokati kovakwaita vepangelo nongudu yovanamapove yo RSF, oo a kwata omido difike lunga punhatu nomwa fila ovakwashiwana omayovi mahapu.
Ibrahim Jaber, omunashipundi wokakomisi kenasha netungululo loshilando Khartum, okwa lombwela oikundaneki mosoondaxa kutya epangelo ola kufamo ovakwaita valo moshilando, opo ku palwe ondjila yealuko lovakwashiwana ava va ya onhapo oita yopashiwana, oyo ya hanauna oshilongo.
Jaber okwa lombwela oshikundaneki shakula sho Suna kutya: “ opolifi yoshilongo oyelipyakidila okukonga ovakwaita aveshe momandiki a yooloka nomeekamba deenhauki, okuva kufa mo moshilandopangelo, opo oilonga yetungululo nealuko lovakwashiwana idule okuya komesho nawa.”
Omatanga o polifi otaku popiwa e lihanena oshilando Khartum, meenghendabala doku eta po eameno konima eshi kwa udika eelopota okudja kovakalimo vomoitopolwa iheyali yoshilando kutya ohava ponokelwa nokunyekwa omaliko avo keengudu dahomata taku feekelwa kutya ovanyeki vahomata ova dja meengudu dovakwaita dokeembinga adishe.
Nopokati opo epangelo ola shiivifa etungululo leenhopa dakula doshilando Khartum, osho yoo okapale keedila kopaiwana, oko ka haunanwa po.
Ovakwaita vepangelo navo oveli pyakidila okutelula eeboma neeshela od otaku tiwa oda andjakana meenhele dihapu doshilando, osho yoo oku eta po omilando deameno da kwata moiti, omo mwa kwatelwa oku keelela omahomato moshilando, oihauto ihena omikanda dayela, osho yoo omidjalo dopakwaita mokati kovakalimo vomoshilando Khartum.
Ovakwaita vepangelo ovanyaekako oshilando Khartum mu Maalitsa neudo, kovanamapove vongudu yoRSF.
