Komanda gopolisi koshitopolwa Omusati, Commissioner Titus Shikongo, okwa kuthileko Eagle FM omaandaha kutya opolisi moshitopolwa oya lopotelwa iiponga yomililo yili omulongo niiyali (12) okuza oshiwike shapiti sigo omehulilo shiwike.
Okwati shimwe shomiiningwanima, omukokele gomivo 88 Ilona Nicodemus, ngoka afikepo epya lye, omanga ali ta kambadhala okudhipaga ombuku.
Commissioner Shikongo, okwati oshiningwanima shika osha holoka potundi 08h00 yongula osoondaha komukunda Onaanda.
“Pahokololo lyomukokele okwati okwa mono ombuku yazi moompumbulu dhomwiidhi gwatulwa pooha negumbo, otayiyi mondunda yokulala, omukokele okwa fikepo omwiidhi ngoka gwali pooha naangoka gwamena mepya, omulilo ogwa andjaka nepya etagu yonagula wo oopala dhondhalate yepya,” Shikongo tati.
Commissioner Shikongo okwa gwedhapo kutya omukokele Nicodemus okwali ena edhilaadhilo lyoku dhipagela ombuku momwiidhi, nokwiiyadha afika epya lye, ashike moshiponga shomulilo inamu ehamekelwa omuntu, inamu kanena omwenyo gomuntu nenge eyonagulo lyomaliko, oopala ashike dhapya.
Shikongo okwa tsikile tati omulilo ogwa holoka konima yesiku sho oshiningwanima shomulilo gwa lopotwa gwa fikapo uunene wohector yimwe moshikunino shiinamwenyo sho Ogongo UNAM Campus Game Park.
“Omuli nguka ogwa holoka olyomakaya, opolisi naakalimo pomudhingoloko oya kwathele nziya okugu dhima, notaku fekelwa gweetithwa koongodhi dholusheno, ashike onkene taku ningwa omakonaakono inashi kolekwa natango osheetithi shago,” Commissioner Shikongo tati.
Omuwiliki gofaalama ndjoka Martin Samuel okwa lombwele Eagle FM, kutya osheetithi shomulilo otashi konaakonwa, aaniilonga yo Nored oya tuminwa komudhingoloko hoka kwa holoka omulilo, oshoka okuna oopala dholusheno notaya pandula molwaashoka omulilo ogwa dhimwa mbala.
Moshiponga shika namo inamu ehamekelwa omuntu, inamu kanena omwenyo gomuntu nenge ekanitho lyomaliko.
Commissioner okwati wo miiponga yilwe yomililo ya lopotwa moshitopolwa oshiwike shaziko, ongaashi egumbo limwe olyapi ombinga, naakalimo yamwe kwalopotwa yafike omankolo nomalundu, omanga taya kambadhla oku fikilamo omayoka nayilwe.
Okwa londodha oshigwana shikale sha kotokela iiningwanima mbika, noku yanda oku tema omililo mokwaahena ontseyo kutya onkalo yombepo oyili ngiini, pamwe omulilo otagu andjakana.
Commissioner Shikongo, okwa dhenge omuthindo kutya aavali naya longe aanona kaaya teme omililo oshoka omwiidhi ogwa pumbiwa kiinamwenyo pethimbo lyokwenye.
Omusati gwalopota iiponga yomililo yili 12
