Omukiintu gomivo 36 Nauta Amalia Munyenga, okwasi eso linyanyaleka konima sho kuume ke kopayihole gomivo 23 emuponokele nokwali takambala okumuteta omutse nekata pethimbo lyoondjuma dha tukuka pokati kawo yaali.
Komanda gopolisi moshitopolwa shaMusati, Commissioner Titus Shikongo, okwati pethimbo lyoontamanana, omufekelwa Kaita Bruno Kaita, okwayi mondunda ya nakuninga oshihakanwa ahomata ekatana, moka emutete lwiikando yontumba momutse nokothingo.
“Edhipago ndika linyanyaleka olya holoka mosoondaha momukunda Ouhwaala moshikandjohogololo shAnamulenge, nomufekelwa okwa tulwa miipandeko, mbaka yaali oyakala haazi megumbo lya yinakulu yanakusa,” Shikongo tati.
Commissioner Okwa gwedhapo kutya nakuninga oshihakanwa okweehama noonkondo ,ena iilalo ya ya mule konima yomutse nokothingo.
Shikongo okwati Munyenga, okwali eehama noonkondo, nokwa hulitha mondjila pethimbo ta falwa koshipangelo shepangelo shaKahao.
Shikongo okwa thothamo kutya mbaka yaali oya monika yeli pamwe puundngosho wuli popepi negumbo omanga oshiningwanima shedhipago inaashi holoka.
Olopota yopolisi oyati mbaka yaali oondjuma pokati kawo odha tukuka omanga yeli mondjila yuuka kegumbo, sho ya thiki megumbo oondjuma odheeta omiyonena nomukulupe ngoka ali megumbo oye awike, okwali ta kambadhala okuya hangukununa.
Kaita okwa holoka mompangu ya mangestalata gOutapi etiyali, okwa kalekwa mokakuma, noshipotha shika oshuundulilwa komasiku 03 ga Nomber 2020, omolwa omakonaakono ga gwedhwapo.
Akanitha omwenyo sho aponokelwa nekatana komulumentu gwe
