Omukokoli goshiketha vatela Oshiwana foundation Cornelius Paulus, okwa lombwele Eagle FM, etitatu kutya okweetelwa omalimbililo kiipotha yoohanona tadhi ekelwahi kooyina, nokuna edhilaadhilo lyoku dhitekula.
Oshiketha sho Vatela Oshiwana Foundation, osha tseyika sha tameke nomakwatho giikulya yaakwashigwana mboka yeli mompumbwe koshitopolwa Erongo, konima sho shakala oomwedhi odhindji shapatwa omolwa ocoronavirus, noshigwana oshakala tashi pula omakwatho giikulya.
“Ngame mwene oshinima shaanona taya ekelwahi osheetelandje omayipulo ogendji, nondi uvite uukwawo wanankali molwa onkalo ndjoka oohanona dhaahena ondjo tadhi dhipagwa kooyina dhimwe tadhi ekelwahi,” Paulus tati.
Shika osha landuka konima sho etiyali, kwa lopotwa omukiintu gomivo omilongo 22 omukalimo gokomukunda Omwaalu kEndola, atulwa miipandeko, sho amono oohanona dhaakwana aakadhona etitano lyaziko, nokwedhi tonyene monayilona ndjoka uumbile mokandjugo komudhingoloko goSky Phase kOngwediva moshitopolwa Oshana, Oshowo omukiintu gomivo 22 omukalimo go komukunda Omawuni moshikandjohogololo Okongo moshitopolwa Ohangwena, atulwa miipandeko sho eekele okanona ke okakadhona koomwedhi 9 mokandjugo nokali kiitswa kena omwenyo.
Omusamane Paulus okwati oshigwana oshina uudhigu owundji, aantu oya pumbwa omahungomwenyo.
“Anona mboka tatu ekeleheni aaleli yokomungula, aaleli yomithigululwakalo, oondohotola naalongi, otwa pumbwa oku gamenenapo oonkalamwenyo dhawo,” Paulus tati.
Okwa gwedhapo kutya aavali mboka yena omadhilaadhilo goku ekelahi uunona wawo, nayewu gandje kuVatela Oshiwana Foundation, a vule oku tala nkene tewusile oshimpwiyu, naamboka taye keshiningwa otaya indilwa yeshi ninge mewukililo, oshoka otapu kala puna omukanda ngoka omuvali ena okushayina uuna okanona ekathigapo.
“Aavali naya manguluke moku konga omahungo mwenyo, opo ya hulithepo omadhilaadhilo gokweekelahi uunona, omukanda tagu ka shayinwa komuvali ngoks ta thigipo okanona ke, otagu gandja uuyelele wo uuna aka galuka ahala okanona ke, otuna uuyelele kutya oye tuushili,” Paulus tati.
Aavali yiindilwa ya hulithepo okweekelahi oohanona
