Josephina Shetunyenga omukalimo gokElyambala moshitopolwa sha Oshana opamwe naakwanezimo lye, oya pula oshikondo shuundjololwele moshipangelo shepangelo shOshakati, shigandje uuyelele weso lyohanona yawo ndjoka ya hulitha momasiku 08 July 2020.
Shika oshalandula konima sho okanona Eveline Nekulu Iyagaya goomwedhi 5 noshiwike shimwe ka hulitha konima yesiku limwe sho kaningilwa etando moshipangelo shoka momasiku 07 July 2020.
Shetunyenga okwati okanona okwe ka fala koshipangelo kena uupyu walonda nokwa koneke taka endelwa komukolo, sho ekafala koshipangelo uupyu okwali wuli pombanda noonkondo taka kwathelwa nomuti goku shunitha uupyu pevi kaapangi.
“Onda lombwelwa kondohola ndjoka yetu ya kula kutya nandiye komathano okanona ka ka thanekwe molwaashoka oye wete kazinda mothingo kombinga yekutsi, konima yomathana onda lombwelwa okanona ndikafale koshitandelo oshishona, ndohotola ngoka eyapo okwati okanona kandje nandika hule etandika langeke pombete ekatande omanga ndeka kwata noka pwali nande elombwelo lyasha lyoku shanga ombapila yetando,” Shetunyenga.
Shetunyenga ta tsikile tati ndohotola okwa wende okanona oowenda 2 mpoka puna oshitumba taya fekele kutya “ethina”.
“Dr okwa tameke teka tete nokambi poshitumba, okwali wo alongitha oshikonde opo avule oku patulula oshilalo nuupu. Takutha akakende kelipo okashona hoka alongitha oku thina oshilalo, ashike omwazi ontsika onshona lela kokali kena ombinzi tayi matuka, tati ethina analipya, okweka tula omuti gwiilalo eteka manga nokwetu shangele omiti ndhoka ndakatala ko apoteka, ashike anda koneke okuza koshitandelo okanona kandje oka leela owala, itaka tonata nuupu nenge kalile,” omuvali gokanona ta tsikile nehokololo.
Okwa hokolola kutya omundohotola okweya laleke eteya pe elombwelo akale ta fala okanona ka ka maangululwe esiku kehe poshipangelo shli popepi, shoya thiki megumbo, okanona natango inaka lunduluka, yina yo kanona okwa tseyithile he yako ngoka ati ongula naya meneke taayi koshipangelo.
“Onda penduka ongula yomasiku 08 ndifale okanona kandje koka pangelogona kEluwa, ashike sho ka maangululwa oka kala kamwena ashike, sho tatu piti mokapangelo oka tameke takalili, tandika mwenitha, konima sho ndeka tula mondhikwa oka kala ashike kamwena ndishi oka kotha, sigo otethiki megumbo sho ndeka kuthamo itaka inyenge, tandi pula aanona megumbo yiithane aashinda oshoka onda limbililwa konima onda tseyithilwa kutya oka hulitha nopolisi oyiithanwa, taya ilepo olutu lokanona,” Shetunyenga tati.
“Esiku lyalandula aapambele yandje oyaka ninga omalongekidho gonzapo yeso noyali ya shangwa osheetithi sheso kashi shiwike (unknown death), molwashoka oya ningwa omudhimba inaagu tandwa”
Omukuluntu goshipangelo shOshakati Dr Korbinian Amutenya okwa popi no Eagle FM etitatu shinasha noshi kumungu pauhupi, tati aavali yokanona hoka oyeya koshipangelo etitatu ndyoka, no kapuna gumwe gomaa pambele atseyitha oshipangelo kutya oyena okanona kahulitha molwashoka oka hulithile momake gomuvali.
Dr Amutenya okwati oya gongala na nambelewa ya yooloka, okwa hwedhapo kutya okwa pewa wo ekalata lyokanona opo ya tamekithe omakonaakono moshinima, molwaashoka kena uuyele washa moshinima, otaya ka mona ndohotola ngoka atanda okanona taya tala keshayino pekalata.
Ewiliko lyoshipangelo olya gandja esiku kaa kwanezimo yokanona kutya eyamukulo otali gandjwa omaandaha goshiwike tashiya.
Mwaamboka ya gongala naapambele moshikumungu shika, omwa kwatelwa omukuluntu guundjolowele moshitopolwa Oshana Johanna Haimene.