Martha Nangombe gumwe gomaantu mboka yiikalekelwa kokule noshigwana koshitopolwa sha Zambezi, ahokolola ko Eagle FM nkene keehuvitile ombili onkalo moka yeli.
Tati okwathiki moshilongo momasiku 16 June 2020 okuza ko Livingstone sha Zambia, hoka eli omwiilongi tiilongele uundohotola.
“Otwa yakulwa nawa moWaterfront Zambezi Lodge komuwiliki gwehala ndyoka, nokwetu fatululile omilandu ndhoka dha tulwapo koshikondo shuundjolowele kutya iikulya mbyoka yena inayi gwana noma kumbatha, ashike ngele omuntu okuna oshimaliwa she otavulu oku gandja oshimaliwa aka talelwe iipumbiwa ye komuniilonga ngoka ena oshinakugwanithwa shoka,’’ Nangombe tati.
Okwa hokolola wo nkene ya fatululilwa omilandu ndhoka dhina oku landulwa pethimbo omuntu iikalekelwa uule womasiku 14 omanga inaaya moshigwana, mwakwatelwa omakonaakono go Covid-19 gopaali, ngoka omuntu kehe ena oku ningilwa pethimbo eli mehala ndyoka.
Nangombe tati okwa konaakonwa lotango konima yomasiku 4, iizemo ye opwa piti omasiku inaa lombwelwa kutya oyili ngiini, okwa tokola opo apule aaniilonga mehala ndyoka, noyati kutya iizemo oyili nawa.
“Shoka sha limbilike ndje noshuuvitha omwenyo gwandje nayi oshoka kutya konima sho nda konaakonwa olutiyali mesiku etimulongo, iizemo yandje inandi yi pewa sigo nda kalamo uule womasiku 17 mehala ndyoka. Onda tokola natango ndi pule aaniilonga kutya iizemo otayi zimo uunake, ashike ondali nda lombwelwa kutya iizemo inayiya nandi tegelele natango,” Nangombe tati.
Okwa tsikile tati konima sho amono kutya ina mbili palelwa keyamukulo ndyoka apewa, okwa pula apopye nomukuluntu goshikondo shuundjolowele pangodhi, ngoka emuyamukula kutya nategelele molwaashoka iizemo yimwe ohayi kalako uule womasiku gakonda 20, tati konima sho agandja ehokololo lye kutya okuna omasiku ga ngambekwa ashune koskola nokweya ashike oku mona okanona ke, oye mwiithanene opolisi taya pula kutya ngoka hakala nokanona ke olye.
“Ondeya tseyithile kutya momasiku 14 June 2020 onda konaakonwa (swab) ko Zambia omanga inaandiya ko Namibia, niizemo oyili nawa ondiyina ashike inaya pwilikina ndje. Oshinima woo sha kutha ndje momutumba omolwashoka otatu ehama momapunda kiikulya mbyoka tatu pewa, ethimbo limwe iikulya ohayi kala yaninga nayi,” Nangombe tati.
Okwa hokolola euvo lyonayi kutya uule womasiku 17 ngoka akala mehala ndyoka, ina talelwapo kaanilonga yuundjolowele mboka yena oshinaku gwanithwa shoku kwashili paleka kutya aantu oyeli monkalo yili nawa, unene okuya kwathela okuya hunga oomwenyo noku ya pula nkene yeli.
“Ngame aaniilonga yoSocial worker nkene ndiilemo inandiya mona, ondamona ashike omumati ngoka heya pekende lyondunda, tu pupu uupyu athikama kokule oshinano sho meta yimwe etashuna, mehala muka tuli kamuna oTV nenge omakwatathano go internet, shika otasheetele omuntu omadhilaadhilo omadhigu, omuntu iikalekelwa mehala lyamwena kaapuna ngoka heendepo puye uule womasiku gakonda po 17,’’ tatsikile.
Nangombe okwati epangelo nali ngambeke omasiku gokwiikalekela aantu, niizemo nayi kale tayi gandjwa pethimbo molwaashoka otashiyi moshipala omalongekidho gaamboka yena okuya komahala ga yooloka nenge yena ethimbo lya ngambekwa.
Oshiwike shapiti ominista yuundjolowele Dr Kalumbi Shangula okwati aaniilonga yo social worker, ohaya talelepo aantu mboka yiikalekelwa esiku kehe noku yapa omayakulo ngoka taga pumbiwa mwakwatelwa ehungo mwenyo.
