Omupopiliko godolopa yOngwediva moshitopolwa shOshana, Jackson Muma, okwa lombwele Egale FM etitatu kutya elelo lyawo olya koneke iiponga yomililo dhepeya momudhingoloko godoolopa, moka taya fekele gweetithwa kaantu ongele opethimbo taya fike omathita momapya gopomudhingoloko godoolopa, okufika iiyagaya pooha dhomagumbo nenge okweekelahi uusekeleta pomahala gena omwiidhi.
“Otwa ndhindhilika kutya aakalimo ohaya fike iiyagaya pomidhingoloko dhawo, na ihaya tonatele omililo shoka hashi etitha omulilo gu andjakane,” Muma tati.
Okwa gwedhapo kutya omililo ndhika odha tameke oku lopotwa uunene momwedhi muka, nomahala gamwe ngoka ga lopotwa gapi kepeya ongaashi oshiputudhilo sho HP Campus mOngwediva, Omatapa, Omapya nomahala galwe, ashike kamuna omuntu eehamekelwamo nenge eyonagulo lyomaliko.
“Molwaashoka otuna oshikondo sha kadhima mulilo shoka hashi yamukula kiiponga yoludhi nduka modoolopa yetu, ina tu lopotelwa eyonagulo lyomaliko, omolwa kadhima mulilo ngoka hathiki poshiponga nziya, ashike ethimbo limwe ohatu iyadha omulilo gwa nyengathana nohagu hala oku kwata komatungo,” Muma tatsikile.
Okwa tothamo kutya iiyetithi woo yomulilo gwepeya yimwe ongaashi omalusheno nomakaya, okwiindile aantu ya kotokele iiyetithi yepeya noku yanda iiponga yomulilo modolopa.
Elelo lyodolopa ya Ongwediva olina wo omalimbililo kaa kalimo yamwe mboka ya pewa iipambu yevi, na ihaya opaleke omahala gawo, omusamane Muma tati, oyena aaniilonga yoku kuthapo iiyagaya momidhingoloko dho doolopa, ashike nashi kale oshinaku gwanithwa shomukalimo kehe ena oshipambu shevi ongele oshegumbo nenge shongeshefa, atungapo nenge inaatunga opo oopaleke ehala lye, konima ta tseyithile elelo likuthepo iiyagaya mbyoka hayi ka ekelwahi ketoto lyiiyagaya hoka kuna wo egemeno oku fikilwa, tati aantu naya yande oku fika iiyaha kehe pamwe noki kaleka omudhingoloko gwayela.
Elelo lyOngwediva lya lopota iiponga yomililo
