Ndinelago Neshuku omukalimo gomomukunda guli popepi nodolopa yOndangwa moshitopolwa shOshana, etiyali okwayi moonkundathana no Eagle FM shinasha nonkalo ya nayipala iiyadha muyo sho aningi etegelelo inali longekidhwa omanga eli mondondo 10.
Ndinelago otati konima sho iidhimbulula kutya okuna etegelelo, ngaashi hashiningwa pamuthigululwakalo goshiwambo, okwa tumwa kaakuluntu afale eteegelelo kumwene, athindikilwa komukulukadhi gopuushinda emupewa kaavali ye.
“Esiku ndyoka sho twathiki megumbo lyanakupandje eteegelelo, inandi kundwamo, ashike omukukadhi ngoka athindile ndje okwati inezamo tuu nande, yina yanamumati okwati epunda kalishi lyomwana, nomwana ihalala niilema molwashoka ngame oshilema koonyala adhihe osho ndavalwa kaandina ominwe dhiihwapo,” Ndinelago tati.
Okwa tsikile tati iihuna mbyoka amono esiku ndyoka oyali itayi vulu okwiidhidhimikilwa, tuulwa omalaka omadhigu kumeme nakuvala omumati.
“Namumati yemwene naye ina yamukula ndje, ondiiyadha etango lyatoko, nesiku ndyoka okwalala taku lokwa, mokati kuusiku lela omusamane tate gwomumati okwaadhandje telokwa ndoondama omvula pokatala keli pondunda yomumati, eta falandje mongulu yimwe moka ependje ekumbatha, ashike ondali ndahuhwa kuutalala,” Ndinelago tatsikile.
Ongula yesiku lyalandula okwati omukulukadhi mwene gwegumbo sho emwaadha mongulu okwemu undulile pondje, eta shuna ashike posheelo shomutala gomumati, omusamane okwakala hemweetele iikulya, nomathimbo gamwe uuna aadhika niikulya kuyinamweno oheyi tilwa kolutu.
Okwati konima sho amono kutya itashizi, okwa tokola ashune kegumbo lyaavali ye, mboka yemutsu omukumo kutya niidhidhimike pamwe omulumentu otekiitala nale.
Okwa hokolola akala ena omayupulo ogendji, tati etegelelo oteli kuthamo molwashoka okwa tindwa.
“Onda ningi onkambadhala ndishi lombwele kuume kandje gopo mukunda, ngoka alombwele ndje ndilongithe iinima oyindji oku kuthamo eteegelelo, oshikando shotango ondatsu omakende koshini, ondega kuthako nokasindo mwolwaashoka otaga tete ndje, tiigatula moka ngulu ngulu gafuluke ngaashi nda lombwelwa ku kuume kandje, ashike ohaluka manga tekambadhala okunwa, onduvu ewi lyazi mungame tali gandandje ino ino,” Ndinelago tati.
Konima yomasiku okwati kuume ke okweya maandjawo temupula ngele shoka emulombwele inashi longa, okwati inashi longa nonande inanwa shili omeya ngoka, okwemupe natango edhilaadhilo afulukithe iigwanga ashike natango inanwa.
Oshikando shimwe etegelelo sho lina oomwedhi hamano (6) kuume ke natango okwemu lombwele afulukithe omalovu go whiskey ashike sho egatula moka ngulu ngulu okahwama omulilo.
Konima sho apulumutha moshipangelo shOndandjokwe okanona ke, kali ahala ekayamithe, tahungwa omwenyo kaapangi, sho eya kegumbo okwa tsikile natango noonkambadhala dhokuka dhipaga, nokuli oshikando shimwe otati omanga ka kotha okwayi kelugo akatale ekatana ando eka hahale omutse, ashike ewi natango olya tameke ino ino, okwali woo amonika kugumwe gomuukadhona womegumbo sho teekelehi ekatana sho apulwa shoka ta kambadhala okuninga okwati kena sho taningi.
Tahokolola kutya okanona ka koko noka tameke oskola okuza mondondo yotango sigo 12 inaaka ndopa tuu nande, ondondo yako 12 okeyi hiti koskola yo Juuso Shikongo Secondary School omuvo 2019 niitsa 28 ashike inakamona ompito yokuya kiiputudhilo longo yopombanda molwaashoka kapuna ngoka tekafutile oskola, meme Ndinelago otati okwiivalelwa oye awike, okwali woo ayi moonto dha kwanezimo aka konge ekwatho ashike inamona sigo oompaka.
Okwati omathimbo gamwe oha hukula ehodhi uuna atala okanona ke molwa iinima iiwinayi mbyoka eka kambadhalela nde inayi pita, no mwalwa shoka takati okahala okwiilongela uulongi nenge uundohotola.
Okwiindile aavali yahulithepo oshinima shoku popila aanona yawo aamati yatinde omateegelelo molwaashoka omuntu ena uulema wontumba nenge eli monkalo yontumba, tati kashishi ethano ewana, okwiindile woo aakiintu ya hulithepo oku kuthamo omateegelelo, tati nayaka konge ehungo mwenyo uuna yiiyadha muupyakadhi ngaashi tuu mboka eenda muwo nande kashali oshipu kuye.
Meme Ndinelago okwiindile woo moshigwana, kaasamaria aanamutimahenda mboka taya vulu oku yambidhidha meyilongo lyokanona ke nota monika kongodhi ndjika 0814391287 ngene oku tumina oshimaliwa komayalulilo go mbaanga ya Hilma Naftal FNB 6225542932.
