Aatamanekwa 6 moshikondo shoohi mboka taya tamanekelwa yafutwa oombumbo kehangano lyoohi lyo Samherji lyoko Iceland, otaya tuminwa ko Windhoek Correctional Facility nena.
Aatamanekwa oyo Bernadus Esau, Sacky Shanghala, James Hatuiyikulipi, Ricardo Gustavo, Tamson Hatuikulipi na Pius Mwatelulo, mboka ngaashi ngeyi yeli kokakuma ko polisi pondje ya Windhoek.
Shika oshakolekwa ku Inspector-General Sebastian Ndeitunga nena, pethimbo ayi moonkundathana no Eagle FM, tati aatamanekwa otaya tuminwa kondjedhililo onene nena uuna omalongekidho agehe geende nawa.
Omatompelo: omolwa egameno lyawo, okukala popepi naapambele yawo, okukala popepi niipangelo oshowo oku hupitha omaaholi gepangelo, uuna opolisi tayi kutha aatamanekwa kokakuma hoka yeli ngaashingeyi okuyafala kompangu nenge kiipangelo.
Netompelo enene ndyoka General Ndeitunga agandja moshinima shika, oondyoka kutya uuna omutamanekwa nenge omufekelwa aholoka mompangu ya mangestalata konima yoowili 48 yemangepo ihe ina pewa iimboolohemo mokakuma nena ohetuminwa kondjedhililo onene.
Tagwedhapo kutya omusamane Esau ngoka ataambelwa moshipangelo omasiku gaziko, onkene eli metonatelo lyoondohotola, ashike inathamuna kutya okuli moshipangelo shini.
