Oonkambadhala odhi li metifa, okukeelela omeya gefundja mOshakati

 

 

Okuza sho efundja lya tameke miitopolwa yokuumbangalantu, oshilando shaShakati osha kala hashi mono iihuna komeya gefundja. Aantu mbono ya tungila pomasilu shampa omvula ya loko, nomeya gefundja e taga thiki mOshakati, ohaya tembuka mo momagumbo gawo, taya yi kaapambele yawo, nenge kootenda hoka haku tembudhilwa aantu.
Oomvula ndatu dha piti po Oshakati osha kala sha kundukidhwa komeya gefundja ngoka hage endele pamwe nomeya gomvula. Onkalo ndjika oya kenyeneke aakalimo, molwaasho momeya inamu kanena owala omaliko gaantu, ndee efundja olya faalele oomwenyo dhaantu pethimbo taya taaguluka omeya ya ka thike komahala gi ili nogi ili. Onkalo oya kala ondhigu okutembudhila omaliko gawo komitunda opo ya vule okufalwa mpoka pu li hwepo. Efundja olya pata wo oondjila nokomahala ogendji ihaku vulu okuthikwa pethimbo lyomvula ngaashi koosikola, koongeleki, kuupangelo nosho tuu.
Opo ku hulithwe po uupyakadhi awuhe hawe etwa kefundja mOshakati, elelo lyoshilando olya holola po omathaneko ogendji gokukeelela omeya gefundja moshilando ngoka gamwe ga ziminwa nale kepangelo, nogendji oga tulwa miilonga. Limwe lyomomathaneko ngano okutembudhila oshigwana shi li pomasilu  komitunda.
Okwa ningwa iigongi oyindji naayehe ya gumwa konkalo ndjika ngaashi  aanangeshefa mboka haya kala ya gumwa unene kefundja, Elelo lyOshitopolwa shaShana, Ehangano lyoNamwater, Uuministili wEvi nayalwe. Elelo olya hala okunenepeka oshilando, opo mbono haya kala kohi yomeya ya tembudhwe, onkene olya ninga iigongi naamboka ye na okutembudhwa po, opo  ku gandjwe ompito kelelo lyoshilando li tameke nomalongekidho, omanga omvula inaayi tameka okuloka.
Oshifokundaneki shetu, osha yi moonkundathana nomupopiliko gwelelo lyoshilando shaShakati, ngono a holola kutya  omalongekidho ogendji gokutula Oshakati muukwatya uupe naunene, taku lalakanenwa okukeelela efundja mOshakati, oga tameka. Jackson Muma okwa ti  aanamagumbo mboka ye na okutembudhwa oya pewa omauyelele, Uuministili wEvi owa tameka nale nokwoopaleka omahala gamwe, omanga aantu yamwe  ya futwa nale opo ya gandje ompito yehumokomeho.
Muma okwa ti,  otaku ka tungwa ekuma  okuza kOkatana, ndyoka tali ka tungwa li na omiyelo opo omeya ga vule okupita nuupu, go kaaga ye meni lyOshakati. Okwa gwedha po kutya kakele kokutunga ekuma, otaku ka nenepekwa omulonga  gwaKatana, tagu tamununwa mo, e tagu ningwa omunene, opo omeya ga kunguluke nawa.
Sho oshigwana oshindji sha kala nuumbanda wontopa yaKandjengedi, elelo lyoshilando Shakati natango oli na omathaneko opo ontopa yaKandjengedi yi nenepekwe nokundjekwa po. Muma okwa ti, nonando iilonga yontopa otayi ka longwa  kehangano lyoRoad Authority, oshi li wo momathaneko gelelo lyoshilando shaShakati.
Omupopiliko gwelelo lyoshilando shaShakati okwa holola kutya, momathaneko gawo agehe ye na, opwa yiwa komeho oku ga tula miilonga. Okwa holola kutya omauyelele oga gandjwa,  niigongi oya ningwa pokati kaamboka ya gumwa koshinima nelelo lyoshilando.
Epangelo olya gandja wo oodola oomiliona 50 dhokutula omathaneko ngaka miilonga unene tuu okwoopaleka omahala, omanga kombinga  yiilonga yokutamununa mo omulonga gwaKatana, epangelo lya gandja oodola oomiliona 33.
Okwa holola wo kutya aantu mbono taya tembudhwa momalukanda ngaashi Oshoopala, Sky nEemwandi mbono haya kala ya gumwa kefundja noonkondo, otaya tembudhilwa komukunda Ekuku. Okwa koleke kutya sigo oompano etembu lyaanagumbo yomEhenye ye li 33 oli li pokutameka  noya futwa nale nokuli. Iilonga yoku ya tembudha otayi tameke wo mbala.
Omupopiliko gwelelo lyaShakati okwa ti, oshinima shetembu otashi ningwa pamilandu, opo ku gandjwe ompito yehumokomeho. Okwi indile wo oshigwana shi taambe ko oshinima shika.
Muma okwa tumbula kutya, nonando pu na omathaneko ngano, oshigwana inashi tegelela ga tulwe miilonga ngaashi sha thanekwa, molwaasho ohapu ya iiyimbi mbyoka tayi kateke oku ga tula miilonga ngaashi sha thanekwa.
Lwopokati mpono, omupopiliko gwelelo lyoshilando shaShakati okwi indile oshigwana shi kaleke po uundjolowele, onkene okwe  shi indile shi opaleke omahala gasho.  Okwa ti oshigwana inashi kala sha ndumbalelwa kiiyagaya, ndee ngele opu na iiyagaya ya ndumbala, naku tseyithilwe elelo opo ku ningwe oonkambadhala dhokukutha po iiyagaya mbyoka.
Okwa indile aakalimo yomOshakati, opo ya fute omayakulo gawo ngaashi omeya nolusheno pethimbo,opo  Oshakati shi hume komeho. Okwa gwedha po kutya, oshigwana nashi  ye kelelo lyaShakati nemanguluko opo shi ete omathaneko omape, ngoka shi wete taga pumbiwa opo Oshakati shi hume komeho.