Opu na omathaneko gokuninga oondjila mbali pokati kOngwediva nOshiko

Omolwomukweyo gwiihauto ngono hagu kala omule pokati kOngwediva nOshakati unene ethimbo lyongula pokati kotundi onti 07:00 nonti 08:00, osho wo komatango pokati kotundi onti-17:00 sigo 18:00 sho aantu oyendji taya zimbuka, oonkambadhala odhi li metifa opo oondjila dhi kale mbali kombinga nombinga(okuya kOshakati nokuza ko wu uka mOngwediva).
Shino osha holoka sho aantu tayi indjipala mOngwediva nOshakati, yo  ishewe aantu otaya landa iihauto esiku nesiku ngaashi sha holoka mushimwe shomoshifokundaneki shomoshilongo pehulilo lyomumvo gwa zi ko kutya Aanamibia otaya landa iihauto  oyindji.
Uupyakadhi mbuno wa kala po ethimbo ele, okwa tegelelwa wu kanduke po meni lyethimbo efupi lela, shaashio iilonga mbika ya tameka nale nokuli. Sho iihauto ya ninga oyindji mondjila ndjino, aantu oya kala haya thiki kwa toka kiilonga nohaya thiki kwa toka komagumbo uuna taya zimbuka komatango.
Iilonga mbino okwa talika yi li ehumokomeho enene kuumbangalantu woshilongo. Ishewe oye etitha opo ontopa yopOngwediva onkulu yi tamununwe mo. Pethimbo ndika okwi ipyakidhilwa nokutungwa ontopa yilwe ompe ya kwatathana naandjoka onkulu. Nonando ontopa ndjino okwa talika yi li oshitopolwa shiilonga yondjila ndjono, otayi kwathele omeya gomvula nogefundja ge ende mo ga manguluka e taga kungulukile miishana go taga kungulukile nduno koombuga. Ndjika onkambadhala yokukeelela omeya gefundja natango moshitopolwa. Ontopa ndjika otayi longwa kehangano lyaChina.
Ontopa yopOngwediva onkulu moshitopolwa shaShana oyi ipyakidhilwa nokutamununwa mo  pethimbo ndika, konima sho ya yonagulwa komeya gefundja ngoka ga dhenge nayi oshitopolwa omimvo 3 dha piti. Nonando iilonga yokutunga ontopa ndjino okwa li kwa thanekwa yi kale ya tamekwa pehulilo lyomumvo gwa zi ko, mewiliko lyehangano lyoondjila lyedhina Road Authority,  iilonga mbika inayi ka tameka pethimbo molwomalongekidho gopambelewa.
Pahokololo lyelelo lyoshilando shaNgwediva, ontopa ndjoka oya tenda kohi, nethaneko li li po olyo ndjono kutya uuna ndjono tayi tungwa pooha nandjono onkulu ya pu okutungwa, nena ndjoka ompe oyo tayi ka longithwa, omanga ndjoka onkulu kaayi na uukolele tayi nawapalekwa.
Elelo olya ti nonando oshidhigu okutunga momvula,  iilonga otaye ende nawa  noyu uka komeho itaayi  vulu we okukeelelwa komvula, shaashi oshitopolwa oshinene shiilonga yopetameko osha longwa ko nale.
Oprojeka yiilonga yokutamununa mo ontopa pOngwediva onkulu, oyi li oshitopolwa shoprojeka yepangelo yokuyambula po omahupilo nokuholola po oompito dhiilonga  moshilongo ngaashi  tayi fupipikwa TEEPEG. Edhingoloko lyotango lyokuninga oondjila mbali otali tameke pOshiko sigo opendiki lyomaulikilo giipindi mOngwediva,  opo nee taku ka tsikilwa nedhingoloko lya landula ko, okutsikila nokutanununa mo ondjila sigo opontopa yaKandjengedi.
Shika okwa talika shi li oshitopolwa oshinene shehumokomeho sho ngashingeyi iihauto tayi ke enda ya manguluka nawa, noshigwana oshindji otashi thiki kiilonga pethimbo.
Lwopokati mpono ontopa yaKandjengedhi mOshakati nayo otayi ka tamekwa mbala konima, shampa ontopa yomOngwediva ya manithwa.